حلمنتيشيات

كفتيرتك

كفتيرتك في السوق مرمية

وكبايتك يابسة ومجدوعة

يا بت الخلطة النوبية

يا حلوة ورائعة ومربوعة

كانونك كان عامر بالناس

صناع عمال ومساعديه

حارسنك طول اليوم

تجار وسماسرة عطلجية

كم استحملتي رزالة الناس

عشان امونة وزكريا

فتشنا عليك في كل السوق

ورتنا صديقتك قمرية

حزنانة بتبكي بدمعا حار

والعدة هناك في البلدية

كشوك يا حواء من الأسواق

واصبحت ايدك ملوية

انتى الجيتي تشدي الشاي

بتفتشي في لقمة هنية

بتخافي كتير من كشف الحال

أبيتي الطرق الملوية

أحلامك على قدر لحافك

ما عائزة عمارة وعربية

عاجبك بيتك في الإنقاذ

أو حاج يوسف ردمية

كشوك يا حواء من الأسواق

والدمعة في خدك متكية

وهسة خلاص خليتي الشاي

بتبيعي مريسة وبقنية

أقطعي

أقطعي يا الجنيتي على القطع

كمبيوترك ما بعرف الجمع

اقطعي خلينا نبكي بالدمع

اقطعي تكتر مصانع الشمع

وينقص رصيد ناس الضرائب

والحبايب ويا كهارب اقطعي

****

أسلاكك بس بيت عنكبوت

والبهبشك ما اظن يموت

أقطعي خليهن يبكن البنوت

وشًوفي الناس العجائب

يا كهارب اقطعي

***

أقطعي وخلينا بس نبقى الكبش

اقطعي اسعارك ما بتنهبش

اقطعي بنوًر بيوتنا بالشمش

وننفك منك يا ام مقالب

ويا كهارب اقطعي

****

اقطعي يا ربة الحسن والجمال

يا قاسية بكيتي الرجال

بتصيدي في الناس بالنبال

تعيشيهم في مقالب

وتخربشيهم بالمخالب

ويا كهارب اقطعي

***

فشلتي ما قدرت واصلت المسيرة

إيه فائدة البحر الدميرة

والكوابل والعواميد الكثيرة

دللوها واملوا بقروشها الخزائن

ورجًعوا الناس للرتاين

وينفكوا من كل المشاكل والمصاعب

والمتاعب يا كهارب اقطعي

***

أقطعي انت احوالك عجيبة

أقطعي ملينا عيشتنا الرتيبة

أقطعي ضلمي المدن الكئيبة

وتقرًص الناس العقارب

والدبايب ويا كهارب اقطعي

***

العذابة

أقولها نصيحة ليك يا بابا

أحذر جيرة العذابة

أهل الضمنة والكشتينة

ديل أهل الطباع الشينة

ليهم مرة نحن مشينا

لا إتغدينا لا إتعشينا

***

لو وقعت ما بتنحل

حتى إن كان بقيت زي بله

ديل القوم في أي محله

نص الليل بشدوا الحلة

***

يعبوا البيت زي الباخرة

ما بعرفوا السراير الفاخرة

دفاتر الكل عليهم ساخرة

أصلوا خلاص بقت دين آخرة

يخلوا البيت مبشتن ديمة

يدخًلوا فيه عدة قديمة

كمان لو فيه شجرة نيمة

يكون وسخان وحالتو أليمه

***

الملاية ما مفروشة

وجوه الأوضة قامت كوشه

ست البيت تكورك فيهم

ديل أخواننا ضربوا قروشا

***

الغسًال يكورك فيهم

والتاجر أبا يديهم

والجزار مشرك ليهم خلاص يا اخواننا عرفوا الفيهم

زحمة شديدة في الشماعة

ريحة كريهة في البلاعة

ديل في الحلة عملوا مجاعة

شفطوا القدرة في نص ساعة

***

ضد العرس رفعوا الراية

ديل إنحلًوا من الداية

لا تطعيم كمان لا رعاية

مافي كرامة ولا سماية