حكـاوى ...وحكاوي زمـان

كان في شيخ كبير في السن وعندو ولد اسمو ياسر وبنت اسمها مريم وماتت أمهم وتركتهم صغار وكان الشيخ العجوز يربي

في أولاده حتى توفي عنهم وخلاهم براهم بعد داك ياسر أخد أختو ومشي بيها للغابة وهناك بني ليهم بيت كبير وقعدوا فيه سوا

وكان ياسر كل يوم يطلع للشغل ويخلي مريم براها ويقول ليها أوعك يا مريم تفتحي الباب لي زول وكان ياسر كلما يجي البيت

ينادي مريم ويقول ليها مريم


مريم بت أمي الصيد اليريم أنا بالي ليك يا مريم وهي ترد عليه وتقول ليه ياسر ياسر ود أمي الدود الجاسر أنا بالي ليك يا

ياسر وبعد كده تفتح ليه الباب وكان جنبهم غول كبييير وبياكل الناس وكان ياسر خايف علي مريم منه عشان كده ما بخليها

تفتح الباب لي زول ولكن الغول ده كان متابع حركات ياسر كلها وحافظ الكلام البنادي بيه مريم وفي يوم من الأيام خلي ياسر

طلع وجاء لي مريم وقعد يقول ليها بصوتو التخين مريم مريم بت أمي الصيد اليريم أنا بالي ليك يا مريم عشان يغشها لكن مريم

عرفتو وقالت ليه امشي يا الغول أنا صوت ياسر اخوي زي صوت الجرس الرنان وأنا عرفتك وما بفتح ليك، قام الغول أتغاظ

شديد ومشي للحداد وقال ليه إلا تصلح لي صوتي ده وتبقيه لي زي الجرس الرنان ولا أنا بأكلك وقام الحداد صلحو ليه وقال ليه

أوعك تاكل أي حاجه إلا بكره مشي الغول وقعد اليوم كلو من غير أكل ولكن لمن العصر جي ما قدر يصبر ولقي ليه حشره

طايره قام اكلها وبعدين مشي تاني لي مريم وقال ليها مريم مريم بت امي الصيد اليريم أنا بالي ليك يا مريم وبرضو مريم

عرفتو وقالت ليه امشي يا الغول أنا صوت ياسر اخوي زي صوت الجرس الرنان امشي من هنا ،، مشي الغول لي الحداد

زعلان زعل شديد


وقال للحداد : أنا الليلة إلا اكلك لانك غشيتني


الحداد قال ليه: أنا ما غشيتك انته اكلت شنو


الغول قال ليه: أنا بس اكلته لي حشره صغيره كانت طايره جمبي


قام الحداد تاني صلح ليه صوتو وقال ليه المره دي أوعك تاكل حاجه ، ومشي الغول لي مريم وقال ليها مريم مريم بت امي

الصيد اليريم أنا بالي ليك يا مريم لكن مريم المره دي قايلاه ياسر وطوالي فتحت ليه الباب قام القول دخل البيت سريع وقفل

الباب وقال ليها أنا الليلة إلا اعرسك وقعد معاها في البيت ولمن جاء ياسر ابي يفتح ليه الباب وعرف ياسر انو الغول دخل لي

اختو ومشي في الغابة قامت لاقتو اللبوه مرت الأسد وهي عاوزه تولد قالت ليع انته ولدني وانا بديك جناي قام ياسر ولدها

ودسه ليه واحد بي وراء ضهرو وقال ليها يلا اديني واحد قالت ليه في زول بدي جناه قام شال الأسد الصغير ومشي وفي

الطريق برضوا لاقتو فهده مرت الفهد عاوزه تولد قالت ليه ولدني بديك جناي وبرضوا ولدا ودس ليه واحد وراء ضهرو وقال

ليها يلا اديني قالت ليه في زول بدي جناه واخد ياسر الفهد الصغير ومشي لحد ما لقي ليه تاني نمره مرت النمر وبرضو

عاوزه تولد قالت ليه ولدني بديك جناي ولما ولدها دسه ليه واحد وراء ضهرو وقال ليها يلا اديني واحد قالت ليه في زول بدي

جناه وبعد كده اخد ياسر الاسد والنمر والفهد الصغار وحفر ليهم حفره كبيره في الغابة وختاهم فيها لحد ما يكبروا وبعد كم يوم

مشي يزور مريم اختو ولقي الغول مافي ونادي ياسر مريم مريم بت امي الصيد اليريم أنا بالي ليك يا مريم فردت عليه مريم

ياسر ياسر ود امي الدود الجاسر أنا بالي ليك يا ياسر وفتحت ليه الباب وقالت ليه سريع ادخل قبل الغول مايجي ويلقاك هنا

وسلم ياسر علي ولد اختو الصغير وقعد معاهم شويه وقبل ما يمشي منهم الغول جاء وخافت مريم علي أخوها شديد وقالت ليه

اهرب سريع لكن ما كان في زمن وجاء الغول وقال لي مريم أنا شامي لي ريحة إنسان انتي معاك منو قالت ليه ما معاي زول

ولكن الولد الصغير قال ابوي ابوي خالي تحت السرير وقام الغول طلع ياسر من تحت السرير وقال ليه الليله دمك جغمة

ولحمك لقمة قام ياسر قال ليه خلاص اديني مهله اقول بس كلمتين الغول قال ليه خلاص قول قام ياسر وقف في نص البيت

وكورك يا نمرو يا أسدو يا فهدو سيدكم اكلو بس طوالي قاموا الاسد الفهد والنمر الكان مربيهم في الغابة جوا سريع جاريين

ودخلوا البيت قام ياسر قال ليهم اكلوا الغول ده وما تفضلوا فيه إلا عضم الربابة هممم اكلوا الغول اكلوا مريم دي وما تفضلوا

فيها إلا عضم الربابة هممم اكلوا مريم اكلوا الولد ده وما تفضلوا فيه إلا عضم الربابة هممم اكلوا الوالد وجات حمامة وقفت

تتفرج عليهم ياسر قال ليهم اكلوا الحمامة دي وما تفضلوا فيها إلا عضم الربابة هممم اكلوا الحمامة وبعد داك اخد ياسر عضام

الربابة وقعد يعزف عليهم جاهو صوت مريم تقول أنا شن سويت يا ضو البيت ،،انا شن سويت يا ضو البيت وبعد كده جاهو

صوت الغول كل من أختك كل من أختك وبعد كده جاهو صوت الولد الصغير انا مالي ياخالي ،، انا مالي يا خالي وبعد كده

جاهو صوت الحمامة جيت اتفرج وفرجوني كسروا عضيم ضهري وريحوني ،، جيت اتفرج وفرجوني كسروا عضيم

ضهري وريحوني ،، وبعد كده عاش ياسر مع حيواناته في الغابة في أمن وسلام ،،

هههههههههههههههههههههههههاى
ابو الكل من اليوم بقت جد الكل

كده اثبتا لينا انك من الناس الحضروا الاسقلال

ههههههههههههههه والله القصة الأولي مبالغة مشكور