السلام عليكم
بلادى أنا
بلاد ناساً مواريثم في أول شي … كتاب الله
وخيل مشدود … وسيف مسنون حداه درع .
تقاقيهم تسرج الليل مع الحيران
وشيخاً في الخلاوي ورع .
وكم نخلات تهبهب فى جروف الساب
وبقرة حلوبة تتضرع وليها ضرع .
وساقية تصحى اليل مع الفجراوى ..
يبكى الليل ويدلق فى جداولو دمع .
يخدر فى بلادى سلام .. خدرة شاربي موية النيل ..
تزرد في البوادى زرع .
بلادي سهول .. بلادي حقول ..
بلادي الجنة .. للشافوها أو للبره بيها سمع .
بلادي أنا تكرم الضيف وحتى الطير يجيها جعان ..
من أطرافها تقيها شبع .
بلادى الصفقة والطمبور ..
بلادى بلاد من التاريخ من ترهاقا لي عن ميسنا
وناسا حنان .. يكفكفو دمعة المفجوع
يبدو الغير على ذاتم .. يقسمو اللقمة بيناتم
ويدو الزاد .. حتى إن كان مصيرم جوع .
ديك أهلى ..
عرب ممزوجة بي دم الزنوج الحارة .. ديل أهلي
ديل أهلي لما أدور أفصل للبدور فصلي ..
أقول بعضى .. ألاقيهم تسربوا فى مسارب الروح بقو كلي
أسياد قلبي والإحساس .
وسافر في بحار شوقم زمان عقلي .
محل قبلت ألقاهم معاي معاي زي ضلى .
لو ما جيت من زي ديل ..
كان أسفاي .. وا مأساتي وا ذلي
تصور كيف يكون الحال ؟
لو ما كنت سوداني .. وأهل الحارة ما أهلي ؟
تصـور كيف ؟
من منا لا يفتخر بانه من هذه الارض الطيبة ا لسودان بلدالمليون ميل مربع ارض الحب ارض العطاء ارض الطيبة والخير
السودان بلد المليون ميل مربع
يتميز السودان بثقافاته وعاداته وقبائله المختلفة التي تنتشر في ربوعه فهناك قبيلة الشايقية والجعلية والرباطاب وقبائل كثيرة ففي هذا البوست المرفق يمكنك ان تعرف اصل القبيلة التي تنتمي اليها وجذورها وتاريخها اتمني ان ينال رضاءكم
السودان يتكون من 570 قبيلة تنقسم إلى 56 أو 57 فئة إثنية على أساس الخصائص اللغوية والثقافية والإثنوجرافية و تتحدث 114 لغة مكتوبة ومنطوقة ، 50 منها في جنوب السودان . وهذه المجموعات الإثنية الـ 57 أعيد تجميعها في ثماني مجموعات رئيسية 39 في المئة عرب أو من أصول عربية ، 30 في المئة جنوبيون أو من أصول أفريقية ، 12 في المئة بجة ، 15 في المئة نوبة ، كما أن هناك مجموعات أخرى مثل الفور والنوباويين والأنقسنا , 51 في المئة يتحدثون اللغة العربية ، 49 في المئة يتحدثون لغات ولهجات أخرى و60 في المئة مسلمون ، 10 في المئة مسيحيون ، 30 في المئة وثنيون وأصحاب ديانات أفريقية مختلف
احبتى ما اود ان اعرفه لماذا ظهرت هذه التعابير:-
(دا حلفاوى ساى )
( ياخى انت شايقى ولا شنو ) .. مع إحترامى للشوايقه.
( الجعليه مافى زيهم )
( شوف العب دا ) مع العلم بأننا كلنا عبيد لله عذ وجل ... وانا افريقى انا سودانى
( مالك مسيخ كده رباطابى ولا شنو ) مع إحترامى للرباطاب
,,,,,,
والامثال كثيــــــــــــــــــــره ..ولا يسعنى زكرها جميعا..
لك الحق فى ان تفتخر بقبيلتك .. لكن من غير إساءه لأى قبيله أخرى
هذا ليس كلامى وحدى بل كلام جاء على لسان اشرف الخلق ( لا فرق بين عربى ولا عجمى إلا بالتقوى )
إذا احبتى لماذا ظهرت هذه التعابير ...
افيدونى..
دمتم
